Kirkeparken omsorgssenter midt i byen

Hammerfest sentrum har hatt ein tett, urban kvartalstruktur. Dette blei forsterka av at Kirkeparken omsorgssenter blei en del av sentrum i 2015. I tillegg er det bygd private bustader på taket og ein offentleg parkeringskjellar.

Det framifrå med Kirkeparken omsorgssenter er det bymessige grepet, som bidrog til at Hammerfest blei nominert til pris som ein av Noregs mest attraktive byar i 2016.

Resultat

• Hammerfest har fått eit omsorgssenter midt i byen med opparbeidde uteområde med park. 
• 15 omsorgsbustadar utan fast bemanning, ti omsorgsbustadar i bukollektiv med delvis bemanning, fem leilegheiter og fem rom til utleige, 50 rom sjukeheimsplassar og 20 dagtilbodsplassar stod klart til innflytting mai 2025.
• Foajé, kafé, kantine og ulike dagtilbod flyt saman som eit slags innvendig byrom på gatesida. Det å kunne møte pårørande på ein anna arena enn i bustaden opplevast som ein kvalitet. Kaféen og kantina har til saman plass til 100 personar og brukast til ulike arrangement. Gymsal/fysioterapi og hårpleie/fotpleie er også tilgjengeleg.
• Ein kombinert innandørs og utandørs sansehage med snøsmelteanlegg er open for alle og skaper aktivitet året rundt. 
• Bygget har flott utsikt frå stuer, fellesareal, bebuarrom og uteareal.

Bakgrunn

Kommunen hadde behov for fleire ulike omsorgsplassar for eldre frå eit stort omland i og kring Hammerfest, mellom anna frå Pensjonærhjemmet i Rypefjord, som skulle leggast ned.

Kommunen lyste ut arkitektkonkurranse. Det var Consto, i samarbeid med Borealis Arkitektar as, Steinsvik Arkitektkontor as og Barlindhaug Eiendom as som utforma forslaget som fekk toppscore på funksjonalitet og val av løysingar. Consto utførte prosjektet son totaltenterprise med samspelfase, der brukarar og byggherren deltok.

Mål og målgruppe

• Eldre med lettare hjelpebehov, eldre med meir omfattande hjelpebehov (inklusiv demens) og yngre personar med demens
• Sjukeheim og omsorgsbustadar med heimleg preg
• Opne tilbod og fasilitetar som mange kan bruke
• Utsikt og kontakt med naturen rundt
• Fleksibelt med tanke på brukarane sitt behov

Byggeprosessen

Prosjektet var Nord-Noregs største byggeprosjekt i åra det var under oppføring. Det var eit komplekst byggeprosjekt med mange utfordringar, i og med at det blei ferdig i fleire etappar. Frå to etasjar under bakken og oppover.

• Parkeringshuset i dei to nedste etasjane sto ferdige i mars 2014. 
• Tre etasjar med pleie- og omsorgssenter blei ferdig i februar 2015.
• Ein etasje med omsorgsbustadar blei ferdig i mars 2015.
• Til slutt sto dei private leilegheitene i dei to toppetasjane innflyttingsklare i juni 2015.

Dermed måtte dei tekke taka mellombels fleire gonger for å halde bygget tett i byggeperioden. Kompleksiteten i byggeprosjektet gav også utfordringar med bæresystemet og rømingsvegar.

Kommunen sine erfaringar frå dei første driftsåra

• Løysinga med både omsorgsbustadar og sjukeheimar gjer det fleksibelt for bebuarane.
• Det fungerer fint å ha både heimetenesta og fast institusjonslege lokalisert. Det gir betre samhandling kring bebuarane.
• Fleire pårørande og besøkande kjem innom, sidan senteret ligg i sentrum.
• Plasseringa i sentrum er på godt og vondt. Fleire besøkande er i utgangspunktet kjempeflott. Samstundes skapar det meir uro på demensavdelinga. Enkelte bebuarar har problem med å tilpasse seg så mykje stimuli.
• Avdelingane har stor grad av institusjonspreg.
• Moglegheitene for å orientere seg i korridorar og areal elles er vanskeleg. Alt ser likt ut, det er lett å gå seg bort.
• Utfordringar med innsyn til romma og stuene frå bygget vis-á-vis parken.

Finansiering

Totale byggekostnadar var på 440 millionar kroner. Sjukeheim og omsorgsbustader blei finansiert med investeringstilskot frå Husbanken. Les meir om investeringstilskot til omsorgsbustadar og sjukeheimar.

Private leilegheiter blei seld på den opne marknaden.

Tips til andre

• Ta innspela frå brukarmedverknaden på alvor, slik at tilpassingane blir færre i etterkant.
• Planlegg ei lita stue, i tillegg til fellesstue på kvar avdeling. Då kan bebuarar som har besøk ta med gjestane dit, i staden for på rommet eller i kaféen.
• Utnytt potensiale i dei opne tilboda som kafé og park.
• Personlege dører er viktig for at bebuarane skal kunne kjenne seg igjen og orientere seg.
• Medisinrom burde vere tilknytt avdelingane.
• Vurder om to og to avdelingar kan ha fellesfasilitetar som medisinrom, lager, skyllerom, møterom, avdelingsleiarkontor, søppelsjakt og skittentøyssjakt mellom seg. Då blir det ikkje så mange dører å forholde seg til i kvar avdeling.
• Hugs å setje inn ein ladestasjon for løfteheisar.
• Planlegg nok areal til dei tilsette, og til å lagre store hjelpemiddel.

Lenker

Kirkeparken pleie- og omsorgssenter og Batteriet bustadar
artikkel på bygg.no frå oktober 2015

Fekk fire timar på seg til å overtyde juryen om at denne byen er Noregs mest attraktive.
artikkel i ifinnmark.no frå mai 2016