Breitt samarbeid og engasjerte folk i Ulstein

Heile kommuneorganisasjonen måtte samarbeide og tenke nytt då utfordringa oppstod. Eit viktig suksesskriterium for å lykkast med busettinga av flyktningane har nettopp vore eit breitt og godt samarbeid mellom fleire aktørar på tvers av kommunesektoren. Arbeidet med å finne aktuelle bustader har vore plassert i Ulstein Eigedomsselskap KF (UEKF), som har solid fagkompetanse innan bustader og utleige.

Først og fremst privat framleige

UEKF hadde elleve ledige kommunale bustader frå før, og brukte i tillegg leige-til-eige prinsippet med startlån aktivt for å frigjere fleire leigebustader i 2022. Kommunen annonserte i lokalavisa og på sosiale medium for å oppfordre lokalsamfunnet til å melde inn bustader til ukrainske flyktningar. Lokalsamfunnet engasjerte seg, og totalt kom det inn 56 svar om ledige bustader frå nokre av kommunen sine 8800 innbyggarar. Dette var avgjerande for at Ulstein kommune kunne oppfylle vedtaket om busetting.

Slik søker Ulstein etter bustader via kommunen si heimeside

Ved framleige har UEKF samarbeidd med representantar frå teknisk etat og brannvesen for å godkjenne bustadene. Dette for å forsikre seg om at bustadene oppfyller dei nødvendige spesifikasjonane for utleige.

Folk melder framleis inn ledige bustader. Det har Ulstein behov for, fordi kommunen har vedteke å busette 125 nye flyktningar i 2023. Kommunen satsar primært på privat framleige i tillegg til å kjøpe fleire bustader, og fortsette å bruke startlån når eksisterande leigetakarar er klare til å kjøpe sin eigen bustad.

Ekstra stilling til busetting

Eigedomsselskapet og flyktningtenesta hadde regelmessige møte for å handtere både små og store utfordringar. Alle dei involverte har vore positive, løysingsorienterte og samarbeidd svært godt. Lokalavisa blei tidleg invitert for å møte nokre av dei nye sambygdingane og bidra til større merksemd om bustadbehovet i lokalsamfunnet.

Samstundes med vedtaket om å auke talet på busette til 135 personar, vedtok kommunestyret midlar til ei stilling i eigedomsselskapet for å jobbe med busettingsarbeidet. Dette styrkte profesjonaliteten i arbeidet med å skaffe bustader og framleige av desse, og det gjorde at kommunen fekk på plass bustader svært raskt. Utan eigedomsselskapet sin innsats ville ikkje flyktningtenesta ha klart dette like effektivt åleine.

Husbanken har ei eiga side med informasjon om bustader for flyktningar