Barn bur bra i Bærum

Resultat

I desember 2020 blei det gjennomført ei evaluering av arbeidet, samarbeidet i kommunen og resultat for familiane. Resultata var svært gode. I evalueringa er det lagt vekt på brukarperspektivet. Den gjer også greie for metode, rutinar, ressursbruk og nokre erfaringar og lærdomar som kan vere nyttig for andre kommunar å få innsikt i.

Resultata for kva familiane gav tilbakemelding på i spørjeundersøkinga, kan vi samanfatte slik:

• Det å eige eigen bustad fører til at barna i familien har ein tryggare og meir stabil kvardag.
• Det er lettare for barna å ta med vener heim når dei eig sin eigen bustad.
• Alle som framleis eig, seier dei er glade for a dei kan bu på same stad så lenge dei vil.
• Dei fleste opplever også at det er lettare å bli kjent med naboane no som dei eig.
• Dei økonomiske bekymringane har ikkje auka etter bustadkjøpet, sjølv om det for somme er meir krevjande økonomisk å eige.
• Dei fleste seier likevel at dei brukar meir tid på å arbeide og tene pengar etter at dei kjøpte eigen bustad.
• Nær sagt alle familiane seier at det er meir motiverande å jobbe når ein eig sjølv.

Bakgrunn

Økonomisk vanskelegstilte barnefamiliar sleit i bustadmarknaden på grunn av høge utleigeprisar i Bærum. Dette førte til uføreseielege buforhold for barna. Bustadane var tronge, hadde låg standard og korte leigekontraktar, og at det å flytte ofte påverka tilhøyrsle og stabilitet. Kommunen var godt kjent med funn frå forskinga som viser at ustabile buforhold i oppveksten har negative konsekvensar for barn og unge sitt livsløp.

Tilbake i 2016 etablerte kommunen eit felles samarbeidsprosjekt mellom avdelinga for bustadbistand i kommunen og Nav. Målgruppa var flyktningfamiliar med eit lovande arbeidsretta løp i kvalifiseringsprogrammet, og som fekk økonomisk sosialhjelp. Kriterium for utveljing av familiane var at dei hadde:

• fått minst ei stabil inntekt
• barn under 18 år
• hadde evne til å handtere eigen økonomi

I tillegg måtte dei vere i stand til å gjennomføre ein kjøpsprosess og følgje opp ansvaret som kjem med å eige eigen bustad. Familiane kunne få sosialhjelp på søknadstidspunktet så lenge Nav Bærum såg at familiane hadde potensiale til å bli økonomisk sjølvhjelpne gjennom å eige.

I 2019 blei prosjektet vidareført under namnet «Barn bor bra i Bærum». Denne gongen blei målgruppa utvida til å også gjelde låginntektsfamiliar med andre typar oppfølging i Nav enn kvalifiseringsprogrammet.

Mål og målgruppe

• Stabile buforhold for barnefamiliar med låg inntekt.
• Familiane skal bli økonomisk sjølvstendige.

Skildring av prosessen

Erfaringa viser at det er naudsynt med tett rettleiing gjennom heile prosessen, Difor utvikla kommunen ein standard rettleiar for å finne dei rette familiane og sørge for at dei fekk god oppfølging:

• For kjøp fekk familiane hjelp til å forstå budsjett, kva det vil innebere å eige eigen bustad og alt som har med startlån å gjere.
• I kjøpsprosessen fekk dei hjelp med bustadsøk, tilstandsrapport, prisar, bodrunde og overtaking.
• Etter gjennomført kjøp var det fokus på budsjett, vedlikehald, burettslag og godt naboskap.

Brukarmedverknad

• Kommunen sine tilsette har fleire samtalar med aktuelle kjøparar for å sørge for at dei tar eit sjølvstendig val når dei søker startlån.
• Alle Nav-rettleiarar har fått sjekkpunkt og rettleiing for å sørge for at familiane får dekkande og god informasjon.
• Gjennom heile prosessen legg Nav og Boligbistand vekt på familiane sine individuelle behov, både når det gjeld naudsynt informasjon og val av bustad.

Finansiering

Økonomisk vurdering av startlån og bustøtte:

• Boligbistand kontaktar Nav for å rådføre seg/avklare om den enkelte husstanden kan få ei anbefaling frå Nav som da kan leggast til søknaden om startlån.
• I desse sakene blir det nytta ti års fastrente og inntil 50 års løpetid.
• I tilsegna blir det lagt inn at både avdrag og renter blir betalt frå starten av, slik at det er moglegheit til å gå inn med avdragsfridom ved behov.
• Bustøtte vurderast, men blir ikkje tatt med i rekninga i utgangspunktet. Bustøtte brukast som eit tryggleiksnett der delar av inntekta i hushaldningane kan felle vekk.

Utfordringar undervegs

• Erfaringane viser at dei som har kommunal bustad, og som dermed har hatt velferdstenester over tid, har eit større oppfølgingsbehov.
• Kommunen ser ei markant utvikling i retning av eit meir omfattande oppfølgingsbehov blant familiane som er med i prosjektet. Ressursbruken kan vere større enn venta.
• Det er store individuelle skilnadar med ulik grad av oppfølging. Det er viktig å sikre at behovet for tett oppfølging i prosessen ikkje er diskvalifiserande i seg sjølv.
• Det er dyrt å bu i Bærum. Bustadar som dekker familien sine behov på storleik og standard er vanskeleg å betene med startlån.
• Det er ein stor fordel at ønsket om å eige kjem frå familiane sjølv.

Tips til andre

• Utarbeid eit klart mandat.
• Ver tydeleg på kven som er målgruppa.
• Oppfølgingsansvar og ulike oppgåver må vere klart definert og fordelt gjennom prosessen.
• Lytt til dei det gjeld.

Vidareføring av arbeidet

Prosjektet held fram, som skildra i Bærum kommune sitt handlingsprogram 2021 - 2024.