Nye utleigebustader i Ålesund med god tilgjenge
Ålesund kommune har fått tilgang til fem utleigebustader med gode kvalitetar gjennom tilvisingsavtale. Bustadene ligg i eit bygg med tre etasjar, flott plassering og utsikt over havet. Heile bygget har tolv leilegheiter med heis, og det er gangavstand til sentrum. Dette er det første tilvisingsprosjektet i Ålesund som har blitt finansiert av Husbanken.
Bakgrunn
Ålesund kommune har ikkje hatt økonomi til å kjøpe nye bustader eller til å fornye bustadmassen sin. Tilvisingsavtalen har vore ein effektiv måte å auke bustadtilgangen på utan store investeringar.
Resultat
- Bygget har 12 leilegheiter som varierer i storleik frå 15 til 62 kvadratmeter.
- Kommunen har tilvisingsrett på fem av leilegheitene.
- Leigeprisane varierer frå 5900 til 12 800 kroner.
- Leilegheitene ligg nær sentrum og har gode sol- og utsiktsforhold.
- Bygget har heis, og alle bustadene er universelt utforma.
- Det er parkeringsplass på tomta for ni av leilegheitene.
Beskriving av prosessen
Ålesund kommune og Husbanken inviterte private aktørar til samarbeid om å bygge utleigebustader med tilvisingsavtalar i 2017. Fire aktørar melde si interesse, og kommunen inngjekk avtalar med to av dei. Den eine avtalen var å bygge utleigebustader i A.O. Devolds gate. Avtalen blei signert hausten 2018.
Tilvisingsavtalen varer i 20 år, og gir kommunen rett til å disponere inntil 40 prosent av leilegheitene til bustadsøkarane sine. Byggeprosessen har vore ryddig, men langvarig. Eit godt samarbeid mellom Husbanken og Ålesund kommune var avgjerande for å få avtalen i hamn.
Finansiering
Den totale kostnaden til prosjektet var på 34,8 millionar kroner. Husbanken har bidrege med 27,5 millionar i lån til utleigebustader. Dette utgjorde 85 prosent av den totale prosjektkostnaden.
Utfordringar undervegs
Prosjektet blei sett i gang midt under koronaperioden. I denne perioden auka prisen på materialar og transport. Reiseforbod for utanlandske arbeidarar førte til ei forseinking på fire månader. Laupande renter og høgare prisar på materialar bidrog til auka kostnader.