Dalaneset brygge ligg i den sørlege delen av Bømlo kommune, på Mosterhamn. Dette småhusprosjektet består av 38 bustader og leilegheiter tilpassa bebuarar i alle aldrar. Bustadene er tilpassa livsløpsbehov, og uteareala er universelt utforma. Langs sjøkanten er det ein open strandpromenade og ei felles sandstrand.
Dalaneset brygge er eit døme på korleis Bømlo kommune strategisk nyttar planverket til å regulere attraktive bustadområde. Kommunen ønskte å bygge nye bustader med kvalitetar som kunne trekkje til seg nye innbyggarar, samstundes som dei planla for stadig fleire eldre som ønskte å velje kvar dei skal bu. Eit tidlegare nedlagt industriområde er no omgjort til eit bustadområde med 38 livsløpsbustader og universelt utforma uteareal. Kvalitetane i prosjektet gjorde at Statsforvaltaren gav løyve til bygging i strandsona.
Målgruppa for prosjektet var innbyggarar i alle aldrar. Kommunen ønskte å trekkje til seg nye innbyggarar med attraktive livsløpsbustader, slik at fleire eldre kunne velje kvar dei ønskte å bu.
Bustadene ligg attraktivt til ved sjøen og har eigne uteareal. Dei inkluderer eit felleshus med kjøkken, som alle bebuarar kan bruke til selskap og sosiale aktivitetar. Felleshuset fungerer òg som ein møteplass som legg til rette for gode relasjonar mellom bebuarane i området.
Parkeringa er løyst med eit felles underjordisk garasjeanlegg, noko som bidreg til å redusere forureining. Uteområda er universelt utforma og inkluderer møteplassar med bord og benkar, leikeplassar for barn, og ein strandpromenade som er open for alle. Nærleiken til sjøen er ein kvalitet som både legg til rette for fritidsaktivitetar og gir bebuarane høve til å kjøpe båtplass.
Dei som førehandskjøpte leilegheiter, fekk delta i planlegginga av sitt byggetrinn saman med kommunen, Husbanken og utbyggaren.
Dalaneset er bygd og selt trinnvis gjennom tre år. Bustadene varierer i storleik frå 68 til 108 kvadratmeter, med prisar mellom tre og fem millionar kroner frå 2021 til 2024. Utbyggaren fekk førehandsgodkjent lån frå Husbanken for å sikre høg bustadkvalitet.
Film om Dalaneset frå KS og Husbanken