Julie Næss-tunet på Roan i Åfjord kommune er ein sjukeheim samlokalisert med bibliotek, legekontor, servicekontor og arbeidsfellesskap. Den nye storstova i kommunen opna hausten 2021 og er på totalt 3000 kvadratmeter i sentrum av Åfjord. På den sertifiserte Livsgledeheimen bur det 17 fornøgde bebuarar.
Roan gamleheim frå 1951 med 15 plassar var i generelt dårleg forfatning, med blant anna setningsskadar i grunnen. Sjølv om bygget var modent for å rivast, fekk inventar, møbel, hjelpemiddel og diverse forbruksmateriell nytt liv i Litauen og Latvia gjennom foreininga Baltikums venner. 1. januar 2020 blei Roan innlemma i Åfjord kommune, og behovet for sjukeheimsplassar på nye Roan sjukeheim blei endra.
Kommunen hadde behov for å erstatte gamleheimen med ein ny sjukeheim og samtidig samle ulike helsetenester saman med enkelte servicefunksjonar for innbyggarane i kommunen. Den primære målgruppa for sjukeheimen var pleietrengande eldre fordelt på 15 langtidsplassar og to korttidsplassar.
Prosessen gjekk i det store og heile «etter boka», i samarbeid med Husbanken og dei andre aktørane. Gamle Roan kommune sette i gong før kommunesamanslåinga. Eit framleis godt sjukeheimstilbod i nye lokale i Roan var ein viktig premiss for at Roan skulle gå inn ein ny og større kommune. Etter at Roan starta opp prosjektet i eigen regi, blei prosjektet overteke og fullført av den samanslåtte kommunen. Prosjektstyringa gjekk føre seg gjennom ein felles byggekomité med representantar frå kommunane Roan og Åfjord.
Leiarar, tillitsvalde, tilsette ved sjukeheimen, fysioterapeut og lege har vore involvert i prosessen undervegs, for å gjere bygget funksjonelt og i tråd med lover og forskrifter.
Kostnadene for sjukeheimsplassane på totalt 133 millionar kroner blei finansiert med 31 millionar kroner i investeringstilskot fra Husbanken. Dette utgjer over 1,8 millionar per sjukeheimsplass. Resten blei finansiert med lån.